Асосий / Билиш муҳим

БИЛИШ МУҲИМ

Ўзбекистон ёшлари умумжаҳон ассоциацияси ҳақида

МАЪЛУМОТ

 

Ўзбекистон Республикаси Президентининг 2017 йил 22 декабрдаги Ўзбекистон Республикаси Олий Мажлисига Мурожаатномасида ёшлар сиёсати сохасида белгиланган устувор вазифаларни амалга оширишга қаратилган топшириқлари ижросини таъминлаш юзасидан Ўзбекистон Республикасининг фуқароси бўлган ва хорижий мамлакатларда ўқиётган ҳамда меҳнат қилаётган ёшлар билан иш олиб бориш, уларнинг ҳуқуқ ва манфаатларини ҳимоя қилиш, уларни ҳар томонлама қўллаб-қувватлаш ва рағбатлантириш, Ватанга садоқат руҳида тарбиялаш, шунингдек жамиятда ўз ўрнини топишига кўмаклашиш мақсадида Ўзбекистон ёшлар иттифоқи қошида “Ўзбекистон ёшлари умумжаҳон ассоциацияси” нодавлат нотижорат ташкилоти ташкил этилди.

 

Ўзбекистон ёшлари умумжаҳон ассоциациясининг асосий мақсад ва вазифалари қуйидагилардан иборат:

 

  • Тегишли мутасадди ташкилотлар билан биргаликда хорижий давлатларда истиқомат қилаётган ўзбекистонлик ёшларнинг муаммолари ва интилишларини таҳлил этиш;
  • хорижий давлатларга таълим олиш ҳамда меҳнат қилиш учун чиқиб кетган ва чиқишни режалаштирган ўзбекистонлик ёшлар учун туркум қўлланмалар тайёрлаш;
  • хорижий давлатларда истиқомат қилаётган барча ўзбекистонлик ёшлар тўғрисида маълумотлар базасини шакллантириш, улар билан алоқа ўрнатилишига эришиш;
  • хорижий давлатларда истиқомат қилувчи етук ўзбекистонлик мутахассисларни мамлакатимизда амалга оширилаётган давлат аҳамиятига молик лойиҳаларга, ёш мутахассисларни танлов асосида вазирлик ва идораларга ҳамда олий таълим муассасаларига жалб этиш;
  • хорижий давлатлардаги ўзбекистонлик ёшлар ўқиётган таълим муассасалари, меҳнат қилаётган корхона ва ташкилотларнинг манзиллари, телефон рақамлари бўйича маълумотлар базасини шакллантириш;
  • интернет тармоғида куну-тун ишлайдиган веб-портал, ижтимоий тармоқларда саҳифалар яратиш ҳамда улар орқали хорижга чиқиб кетган ва чиқишни режалаштирган ёшлар учун хизматлар кўрсатилишини, шунингдек, маслаҳатлар бериб борилишини йўлга қўйиш;
  • Ассоциациянинг хорижий давлатлардаги фаолиятини ўзбек ёшлари кўпчиликни ташкил этадиган мамлакатларда Ўзбекистоннинг дипломатик ваколатхоналари ёрдамида йўлга қўйиш;
  • хориждаги ёшларимизни Ўзбекистон тарихи, маданияти, ўзбек тили ва адабиёти, буюк аждодларимизнинг бой маданий мероси ҳамда дунё тамаддунига қўшган ҳиссаси ҳақидаги маълумотлар билан таништириб бориш;
  • таниқли шахслар билан учрашувлар, концерт дастурлари, фестиваллар, бадиий ва адабий кечалар ташкил этиш орқали хориждаги ёшларимизда ватанпарварлик, юрт билан фахрланиш туйғуларини шакллантириш, соғлом турмуш тарзини тарғиб қилиш;
  • ёшларга Ўзбекистонда амалга оширилаётган ислоҳотлар, қабул қилинаётган қонун ҳужжатлари натижасида рўй бераётган ўзгаришлар, қулай тадбиркорлик муҳити ҳамда яратилаётган иш ўринлари ҳақида ахборот бериб бориш, чет элдан қайтиб келган ёшларнинг жамиятга мослашишида ва ўз ўрнини топишида қўмаклашиш;
  • ёшларни турли таҳдидлар (экстремизм, терроризм, уюшган жиноятчилик, одам савдоси ва бошқалар)дан ҳимоя қилишга қаратилган мақсадли чора-тадбирларни амалга ошириш, бундай салбий ҳолатларга тушиб қолган ва унинг қурбонига айланган ўзбекистонлик ёшларга ҳуқуқий ва психологик ёрдам кўрсатиш;
  • хорижий мамлакатларга уюштириладиган олий ва юқори даражадаги ташрифлар, шунингдек, бошқа хизмат сафарлари давомида Ўзбекистон вакилларининг Ассоциациянинг хориждаги ваколатхонлари фаоллари билан учрашувларини ташкил этиб бориш ҳамда бошқа қатор чора-тадбирларни амалга ошириш.

Бугунги кунда Ўзбекистон ёшлари умумжаҳон ассоциациясининг Хитой Халқ Республикасида, Россия Федерациясида, Германия Федератив Республикасида, Туркияда ва Япония Республикасида вакилларига фаолият юритиб келмоқда.